(پاک صحافت) موجودہ عہد میں اسمارٹ فونز کو چارج کرنے کی ٹیکنالوجی کافی بہتر ہوئی ہے مگر ابھی بھی کسی فون کی 100 فیصد چارجنگ کے لیے کم از کم ایک گھنٹہ تو انتظار کرنا پڑتا ہے۔ تاہم بہت جلد آپ اپنے اسمارٹ فون کو محض 5 سیکنڈ کے اندر مکمل چارج کر سکیں گے۔ جی ہاں ایک کمپنی نے ایسی ڈیوائس تیار کی ہے جو چند سیکنڈ میں آپ کے اسمارٹ فون کو چارج کرسکتی ہے۔
سویپ اٹ نامی اس ڈیوائس کو لاس ویگاس میں کنزیومر الیکٹرونکس شو (سی ای ایس) کے موقع پر پیش کیا گیا۔ دیکھنے میں یہ ڈیوائس کسی ٹشو باکس جیسی نظر آتی ہے مگر اس کے کھلے منہ میں آپ کو فون انسرٹ کرنا ہوتا ہے۔ فون اندر جانے کے بعد محض 2 سیکنڈ میں ایک نئی بیٹری کے ساتھ باہر آتا ہے اور ایسا محسوس ہوتا ہے کہ یہ جادو ہوا ہے۔ اسے استعمال کرنے کے لیے صارف کو ڈیوائس کے ساتھ ایک مخصوص فون کیس کی بھی ضرورت ہوتی ہے جسے کمپنی نے لنک کا نام دیا ہے۔
اس کیس کے بیک پر ایک بیٹری ہوتی ہے جسے ڈیوائس میں انسرٹ کیا جاتا ہے اور وہی بیٹری پہلے سے مکمل چارج 3500 ایم اے ایچ بیٹری سے بدل جاتی ہے تاکہ آپ کو فون مکمل چارج ملے۔ اسے تیار کرنے والی کمپنی کے مطابق بیٹری بدلنے کا عمل 2 سیکنڈ میں مکمل ہو جاتا ہے اور درحقیقت اتنا برق رفتار ہے کہ اکثر صارفین کو اس کا علم ہی نہیں ہوتا۔ کمپنی نے بتایا کہ یہ ڈیوائس ہر فون کے ساتھ کام کرسکتی ہے بس آپ کے پاس سویپ اٹ کیس ہونا چاہیے۔