(پاک صحافت) گوگل کی جانب سے جنریٹیو اے آئی ٹول بارڈ کے لیے ویٹ لسٹ کو ختم کرکے اسے 180 سے زائد ممالک اور خطوں میں متعارف کرا دیا گیا ہے۔ 2 ماہ کی آزمائش کے بعد گوگل کے اے آئی چیٹ بوٹ انگلش، جاپانی اور کورین بولنے یا لکھنے والوں کے لیے دستیاب ہے۔
تفصیلات کے مطابق گوگل کے سربراہ سندر پچائی نے سالانہ ڈویلپر کانفرنس کے موقع پر دنیا بھر میں بارڈ کو متعارف کرانے کا اعلان کرتے ہوئے کہا کہ ہم بہت تیزی سے چیٹ بوٹ کو بہتر بنا رہے ہیں اور اس میں نئی چیزوں کا اضافہ کر رہے ہیں، یہ سب عمل بہت زیادہ ذمہ داری سے کیا جا رہا ہے۔ ان کا کہنا تھا کہ بارڈ اب متعدد پروگرامنگ کوڈز کو سپورٹ کرتا ہے اور پہلے سے زیادہ اسمارٹ ہو چکا ہے۔
واضح رہے کہ کمپنی کے مطابق بارڈ کو زیادہ ایڈوانسڈ لارج لینگوئج ماڈل پی اے ایل ایم 2 پر منتقل کیا گیا جس سے کوڈنگ، منطق اور ریاضی سمیت کافی کچھ بہتر ہوا ہے۔ کمپنی کے مطابق اس چیٹ بوٹ کے لیے 40 زبانوں کی سپورٹ آنے والے مہینوں میں فراہم کی جائے گی۔ بارڈ پراڈکٹ ٹیم کے سربراہ Jack Krawczyk نے بتایا کہ اس بات کا خیال رکھا گیا ہے کہ اے آئی کا رویہ انسانی دلچسپی کے مطابق ہو۔