کراچی (پاک صحافت) اسٹریمنگ پلیٹ فارم نیٹ فلیکس نے آخر کار اینڈرائیڈ گیمز متعارف کرادیے اور اب سبسکرائبرز ویڈیوز کے ساتھ ساتھ گیمز سے بھی محظوظ ہوسکیں گے۔ تاہم نیٹ فلیکس نے خبردار کیا ہے کہ کمپنی ابھی گیمز کی ریلیز کے ابتدائی مراحل میں ہے اور اس حوالے سے بہت سا کام کرنا باقی ہے۔
تفصیلات کے مطابق کمپنی کے انتباہ سے معلوم ہوتا ہے کہ فی الحال صارفین کو یہ گیمز کھیلتے ہوئے مشکلات کا سامنا ہوسکتا ہے۔ خیال رہے کہ یہ گیمز صارفین کو نیٹ فلیکس پر ملیں گے لیکن انہیں ڈاؤن لوڈ کرنے کے لیے گوگل پلے پر لے کر جائے گا۔ ایسا معلوم ہوتا ہے کہ نیٹ فلیکس چاہتا ہے کہ اس کے سبسکرائبرز ان گیمز کے ایڈ فری ورژن سے مستفید ہوسکیں۔
واضح رہے کہ نیٹ فلکس کا مقصد یہ ہے کہ وہ اپنے صارفین کو بغیر انسٹال کیے براہ راست ایپ سے گیمز کھیلنے دیا جائے جس کا مطلب ہے کہ گوگل پلے اسٹور کو بالآخر لوپ سے نکال دیا جائے گا۔ یہ گیمز ابھی صرف پولینڈ میں دستیاب ہیں لیکن دنیا بھر کے دیگرخطوں میں جلد بھی متعارف کرائے جائیں گے۔