تونسہ (پاک صحافت) وزیراعلی پنجاب مریم نواز شریف نے کہا کہ کل ایک گھریلو خاتون جس کا سیاست سے تعلق نہیں اس نے دوست ملک پر حملہ کیا، انہوں نے پاکستان کے محسن ملک پر حملہ کیا۔
تفصیلات کے مطابق کچھی کینال کی بحالی کی تقریب سے خطاب کرتے ہوئے وزیراعلی پنجاب مریم نواز شریف نے کہا کہ کچھی کینال کی بحالی میرے لیےخوشی کا دن ہے، مجھے خوشی ہے نوازشریف دور میں اس منصوبے کا آغاز ہوا، کچھی کینال کے پانی سے بلوچستان کی زمینیں آباد ہوں گی۔ دشمن انتظار میں بیٹھے تھے کہ پاکستان ڈیفالٹ کرجائے، اب ہر روز اچھی خبر آرہی ہے، سٹاک مارکیٹ بلند ترین سطح پر پہنچ گئی اور مہنگائی کم ہو رہی ہے۔
مریم نواز کا مزید کہنا تھا کہ جب بھی ملک میں ترقی آتی ہے (ن) لیگ کی حکومت ہوتی ہے، دھرنوں، احتجاج کی کال بار بار ناکام ہو رہی ہے، پی ٹی آئی دور میں دوست ممالک کو ناراض کیا گیا، شہباز شریف کی قیادت میں سفارتی سطح پر کامیابیاں مل رہی ہیں۔ آج بھی فارن پالیسی پر حملے ہو رہے ہیں، ایسے وقت میں حملے جب پاکستان ترقی کر رہا ہے، ان کا ایجنڈا بڑا خطرناک ہے۔
انہوں نے کہا کہ پاکستان پر حملے کوئی خارجی نہیں خیبرپختونخوا حکومت کر رہی ہے، پنجاب پولیس کے جوانوں کے سر دہشت گرد نہیں خیبرپختونخوا کی حکومت پھاڑ رہی ہے۔ ہم نے تو سنا تھا صوبوں کے درمیان ہم آہنگی ہونی چاہئے، جس ملک میں ایک صوبہ دوسرے صوبے پر چڑھائی کرے وہاں سرمایہ کاری کیسے آئے گی۔