راولپنڈی (پاک صحافت) پاک فوج کے شعبہ تعلقات عامہ آئی ایس پی آر کے ڈی جی نے آپریشن عزم استحکام کا اصل مقصد بتا دیا ہے۔
ڈی جی آئی ایس پی نے پریس کانفرنس کرتے ہوئے کہا ہے کہ یہ ماضی کے آپریشنز سے مختلف ہے۔ تاہم مقامی لوگوں کا کہنا ہے کہ فوجی آپریشنز ماضی میں بھی انہیں بے گھر کرتے آئے ہیں اور یہ آپریشن بھی ان کے لیے خوف کا سبب بن رہا ہے۔
ڈی جی آئی ایس پی آر نے اس حوالے سے پریس کانفرنس میں وضاحت کرتے ہوئے کہا ہے کہ عزم استحکام صرف فوجی آپریشن نہیں ہے بلکہ یہ ایک جامع انسداد دہشت گردی مہم ہے، جو ملک میں استحکام کی بحالی کو مدنظر رکھتے ہوئے ڈیزائن کی گئی ہے۔
ان کا مزید کہنا تھا کہ اس آپریشن کے خلاف ایک بیانیہ بنایا جا رہا ہے کہ اس سے آپریشن ضرب عضب کی طرح لوگ بے گھر ہوں گے، حالانکہ ایسا بالکل نہیں ہوگا۔ اس آپریشن کا مقصد پہلے سے موجود نیشنل ایکشن پلان پر عملدرآمد کرنا ہے۔