اسلام آباد (پاک صحافت) وزیراعظم کا کہنا ہے کہ پاکستان کے معاشی حالات جلد اچھے ہونگے، قوم کو زیادہ سے زیادہ ریلیف دیں گے۔
تفصیلات کے مطابق وزیراعظم ہاؤس سے جاری بیان میں بتایا گیا ہے کہ وزیراعظم شہباز شریف کی صدارت میں ن لیگ کے قومی اسمبلی کے ارکان اور وفاقی وزرا کا اہم اجلاس ہوا، جس میں شہباز شریف نے حکومت کی معیشت میں بہتری کے لیے اقدامات اور پالیسیوں، غیر ملکی سرمایہ کاری اور موجودہ سیاسی صورت حال پر اعتماد میں لیا۔
اجلاس کے شرکا نے وزیراعظم کی قیادت میں ملک کی معاشی بہتری کے لیے کیے گئے اقدامات اور سفارتی محاذ پر کامیابیوں پر خراج تحسین پیش کیا۔ اس موقع پر ملک کی موجودہ سیاسی صورت حال کے حوالے سے مشاورت بھی کی گئی۔
وزیراعظم کا کہنا تھا کہ اللہ کے فضل سے ملک کی معاشی صورت حال بہتر ہو رہی ہے، ملک استحکام کی جانب بڑھ رہا ہے۔ بیرونی سرمایہ کاری کے فروغ اور سفارتی محاذ پر کامیابیوں کا سہرا پوری حکومتی ٹیم کو جاتا ہے۔ اگر ہم نے ایسے ہی محنت جاری رکھی تو پاکستان کے معاشی حالات جلد ٹھیک ہو جائیں گے، پوری کوشش کر رہے ہیں کہ عوام کو زیادہ سے زیادہ ریلیف پہنچائیں۔