اسلام آباد (پاک صحافت) وزیراعظم شہباز شریف کے مشیر سیاسی امور رانا ثناءاللّٰہ نے کہا ہے کہ ٹرین یرغمال بنانے والے دہشت گرد کسی قسم کی ہمدردی کے مستحق نہیں۔
تفصیلات کے مطابق رانا ثناءاللّٰہ نے کہا کہ ن لیگ کی قیادت بلوچستان کے مسائل پر فکرمند ہے، دہشت گردوں نے ٹرین کو یرغمال بنایا اور بے گناہ لوگوں کو قتل کیا۔ ٹرین یرغمال کرکے بے گناہ لوگوں کو قتل کرنے والے دہشت گرد کسی قسم کی ہمدردی کے مستحق نہیں ہیں۔ معاملہ تب بگڑے گا جب کسی ایشو پر تصادم یا ضد کی صورتحال ہو۔
رانا ثناءاللہ کا مزید کہنا تھا کہ وزیراعظم شہباز شریف سے میٹنگ میں پی پی چیئرمین بلاول بھٹو، خورشید شاہ، گورنر پنجاب اور دیگر قیادت تھی۔ وزیراعظم نے پیپلز پارٹی کو یقین دلایا کہ 6 کینال کے معاملے پر بیٹھ کر بات کریں گے، کینالز کے معاملے پر جو اتفاق رائے سے فیصلہ ہوگا اس پر عمل ہوگا۔
انہوں نے کہا کہ سندھ میں 6 کینالز کے معاملے پر اونرشپ کا مسئلہ ہے، یہ اونرشپ پیپلز پارٹی کو لینی ہی پڑے گی وہ نہیں لیں گے تو کوئی اور لے گا۔ پیپلز پارٹی ان چیزوں کو سمجھتی ہے اس اسپیس کو پر کریں گے، پیپلزپارٹی اس مسئلے پر اونرشپ لے گی تو درست فیصلہ کرے گی۔
اُن کا کہنا تھا کہ 6 کینالز پر سندھ میں جس طرح کی سیاست ہورہی ہے پیپلز پارٹی کو اس اسپیس کو کور کرنا چاہیے۔