لاہور (پاک صحافت) وزیراعلی پنجاب مریم نواز ترک خاتون اوّل کی خصوصی دعوت چوتھی اناطولیہ ڈپلومیسی فورم کی 3 روزہ تقریب میں شرکت کے لیے ترکیہ کا دورہ کریں گی۔
تفصیلات کے مطابق ترکیہ کی خاتون اوّل ایمنہ اردوان نے وزیراعلی مریم نواز کوانا طولیہ ڈپلومیسی فورم سے خصوصی خطاب کی دعوت بھی دی ہے۔ وزیراعلی مریم نواز کے اعزاز میں خصوصی ثقافتی تقریب ”اناطولیہ“ بھی منعقد کی جائے گی۔ ترکیہ کی خاتون اوّل نے وزیراعلی مریم نواز کو اپنے دعوت نامہ میں پیغام دیا کہ مجھے اناطولیہ ڈپلومیسی فورم میں آپ کی شرکت سے بے حد خوشی ہوگی۔ امید ہے کہ آپ اناطولیہ کانفرنس میں میزبانی کا شرف ضرور عطا کریں گی۔
ذرائع کے مطابق منتظم ترک وزارت خارجہ نے کہا کہ ہمیں یقین ہے کہ مریم نواز کی اے ڈی ایف 2025ء میں شرکت گرانقدر ثابت ہوگی۔ انا طولیہ ڈپلومیسی فورم کا عنوان ”منقسم دنیا میں سفارتی روابط کی بحالی“ ہوگا۔ اناطولیہ ڈپلومیسی فورم میں دنیا بھر سے سربراہان مملکت، ممتاز سفارتکاروں، رائے عامہ کے لیڈرز اور چیدہ چیدہ شخصیات شریک ہونگی۔
وزیراعلی مریم نواز اناطولیہ کانفرنس کے دوران اے ڈی ایف لیڈرز پینلز میں شرکت کریں گی، اے ڈی ایف ٹاکس اور اے ڈی ایف راؤنڈز کا حصہ ہونگی اور ”منقسم دنیا میں مستقبل کی تشکیل او ر علم سے تبدیلی کی طاقت“ کے عنوان سے خصوصی خطاب بھی کریں گی۔