اسلام آباد (پاک صحافت) وزیر ریلوے حنیف عباسی نے کہا کہ جعفر ایکسپریس سروس دوبارہ بحال ہو چکی ہے، بولان ایکسپریس کو اب دو کے بجائے ہفتہ بھر چلانے لگے ہیں۔
تفصیلات کے مطابق میڈیا سے گفتگو کرتے ہوئے وزیر ریلوے حنیف عباسی نے کہا کہ ایم ایل ون معاہدے کے بہت قریب پہنچ چکے ہیں۔ سکیورٹی فورسز کے جوان ملک کے دفاع کے لیے قربانیاں دے رہے ہیں، شہدا کی قربانیاں ہمارے لیے قابل فخر ہیں۔
حنیف عباسی کا مزید کہنا تھا کہ جعفر ایکسپریس واقعے میں ہلاک دہشت گردوں سے جدید ہتھیار برآمد ہوئے، دشمن کی تمام سازشوں کو ناکام بنائیں گے، دشمن کو اس کے مذموم عزائم میں کامیاب نہیں ہونے دیں گے۔
انہوں نے کہا کہ ٹرینوں کی بروقت روانگی اور صفائی ستھرائی پر کوئی سمجھوتہ نہیں ہوگا، تمام ریلوے سٹیشنز کی اپ گریڈیشن کا منصوبہ جلد شروع ہونے جا رہا ہے۔ ملک کی ترقی کے لیے سب کو اپنا کردار ادا کرنا ہوگا۔