اسلام آباد (پاک صحافت) وزیراعظم شہباز شریف کا کہنا ہے کہ آج ایک مرتبہ پھر 4 اپریل ہی کے روز عدل و انصاف کا قتل کردیا گیا۔
تفصیلات کے مطابق وزیراعظم میاں محمد شہباز شریف نے قومی اسمبلی میں اظہار خیال کرتے ہوئے کہا ہے کہ 4 اپریل کے روز ذوالفقار علی بھٹو کو پھانسی دی گئی تھی، آج ایک مرتبہ پھر 4 اپریل ہی کے روز عدل و انصاف کا قتل کردیا گیا ہے۔
وزیراعظم شہباز شریف کا مزید کہنا تھا کہ سپریم کورٹ کے تین رکنی بینچ کے فیصلے کی جتنی مذمت کی جائے کم ہے، ہم نے فل کورٹ کے قیام کا مطالبہ اس لیے کیا تھا تاکہ کسی فریق کو فیصلے پر اعتراض نہ ہو۔
انہوں نے کہا کہ سابق وزیراعظم ذوالفقار علی بھٹو کا جوڈیشل قتل کیا گیا جس کا اعتراف بعد ازاں ایک جج کی جانب سے بھی کیا گیا، ذوالفقار علی بھٹو کی پاکستان کے لیے گراں قدر خدمات ہیں ان کا شمار 1973ء کے آئین کے بانیوں میں ہوتا ہے۔