لاہور (پاک صحافت) عظمی بخاری کا کہنا ہے کہ 9 مئی کے مرکزی ملزمان اور شرپسندوں کو سیاست کے لبادے میں چھپنے نہیں دیں گے۔
تفصیلات کے مطابق صوبائی وزیر اطلاعات و ثقافت پنجاب عظمی بخاری نے کہا ہے کہ مریم نواز پوری تحریک انصاف کے عصاب پر سوار ہیں۔ مریم نواز سے کارکردگی میں مقابلہ کریں زبان درازی مت کریں۔ آپ آج بھی باز نہیں آئے دوسرا 9 مئی کرنے کی پلاننگ کررہے ہیں۔ 9 مئی کے واقعات پر آپ کو شرمندگی ہے نہ آپ نے کبھی اعتراف کیا۔ جب شہداء کی یادگاروں کی بے حرمتی کررہے تھے تب ملک و قوم کا خیال کیوں نہیں آیا۔
عظمی بخاری کا مزید کہنا تھا کہ 9 مئی کا انتشاری ٹولہ اپنے غیرسیاسی گناہوں کا ملبہ مریم نواز کے کھاتے میں مت ڈالے۔ مریم نواز کو بانی پی ٹی آئی اور جعلی پیرنی کی فرمائش پر موت کی چکی میں قید رکھا۔ مریم نواز نے عمرانی آمریت کا جرأت اور بہادری سے مقابلہ کیا کبھی جیل میں سہولیات نہ ملنے کی شکایت نہیں کی۔
انہوں نے کہا کہ آپ کو مریم نواز نے نہیں کہا تھا جائیں فوجی تنصیبات پر حملے کریں اور شہداء کی یاد گاریں جلائیں۔ اپنے جرائم کو انسانی حقوق، عورت کارڈ اور آئین کے پیچھے مت چھپائیں۔