اسلام آباد (پاک صحافت) عرفان صدیقی کا کہنا ہے کہ 9 مئی کے حوالے سے بھی فیض حمید کے کردار کا اشارہ ملتا ہے۔
تفصیلات کے مطابق سماجی رابطے کے پلیٹ فارم ایکس پر جاری اپنے پیغام میں لیگی رہنما و سینیٹر عرفان صدیقی نے کہا ہے کہ بڑے ادارے سے بڑی خبر آئی اس کی توقع نہیں تھی، ماضی میں آئی ایس آئی کے کسی سربراہ کو ایسی کارروائی کا سامنا نہیں کرنا پڑا۔
عرفان صدیقی کا مزید کہنا تھا کہ ریٹائرمنٹ کے بعد آرمی ایکٹ کی خلاف ورزیوں کا معاملہ زیادہ اہم ہے، فیض حمید کی ریٹائرمنٹ کے بعد انتخابات اور 9 مئی کے واقعات ہوئے، انتخابات میں وہ اپنے علاقے میں کھل کر پی ٹی آئی کے لیے کام کرتے رہے۔
انہوں نے کہا کہ وقت آنے پر بہت سی چیزیں سامنے آئیں گی اور کارروائی کے دور رس نتائج سامنے آئیں گے۔ اس واقعہ سے پیغام گیا ہے اگر فوج کڑا احتساب کر رہی ہے تو باقی ادارے بھی کریں۔ فیض حمید نے میڈیا اور عدلیہ پر دباو ڈالا، جسٹس شوکت صدیقی کے گھرجا کر دباؤ ڈالا اور ان سے نواز شریف اور مریم نواز کو سزا دینے کا کہا۔