اسلام آباد (پاک صحافت) خواجہ آصف کا کہنا ہے کہ 50 سال میں کوئی بھی اسمبلی آئینی اور قانونی طریقے سے رخصت نہیں ہوئی۔
تفصیلات کے مطابق قومی اسمبلی میں اظہار خیال کرتے ہوئے وزیر دفاع خواجہ آصف نے کہا ہے کہ بھارت نے 5 اگست کو اپنے آئین میں تبدیلی کی، ہمارا کشمیر پر 75 سال سے مؤقف بالکل واضح ہے، پاکستان نے کشمیر کے لیے بہت قربانیاں دی ہیں، کشمیری بھائیوں نے بھی ہزاروں قربانیاں دی ہیں، پوری قوم کشمیر سے متعلق متفق ہے۔
خواجہ آصف کا مزید کہنا تھا کہ اقوام متحدہ کی قراردادوں پرعمل درآمدنہیں ہورہا، ہماری کمٹمنٹ خون سے لکھی گئی ہے، فلسطین اور کشمیر میں ہزاروں لوگ شہید ہورہے ہیں، اس مسئلے کو سپورٹ نہیں کرسکتے تو اس کی نفی بھی نہ کریں۔
انہوں نے کہا کہ غزہ میں اسرائیل کی بربریت جاری ہے، فلسطین میں بھی لاکھوں افراد شہید ہوچکے ہیں۔ عدالت کا کام آئین بنانا نہیں آئین کی تشریح کرنا ہے، ادارے ایک دوسرے کے اختیارات میں مداخلت کریں گے تو مسائل بڑھیں گے، جمہوریت کا سفرجاری رہنا چاہیئے۔