اسلام آباد (پاک صحافت) مذہبی رواداری کا نیا باب شروع، پاکستان نے 50 سال میں پہلی بار بیساکھی کے لیے بھارتی زائرین کو ریکارڈ 6,629 ویزے جاری کیے، پاکستان کا یہ اقدام بین الاقوامی توجہ کا مرکز بن گیا۔
تفصیلات کے مطابق پاکستان نے تاریخی اقدام کرتے ہوئے بھارتی سکھ زائرین کو بیساکھی 2025 کے موقع پر 6,629 ویزے جاری کیے جو معمول کی تعداد سے دوگنا ہیں، یہ قدم گرو نانک کے جنم استھان ننکانہ صاحب تک رسائی کو یقینی بناتے ہوئے پاکستان کے مذہبی ہم آہنگی کے عزم کا عملی اظہار ہے۔ علاقائی چیلنجوں کے باوجود پاکستان نے 6,629 سکھ زائرین کو ویزے جاری کر کے ثابت کیا کہ مذہبی روابط سیاست سے بالاتر ہیں، یہ فیصلہ عالمی برادری کی جانب سے بھرپور سراہا گیا۔
ذرائع کے مطابق پاکستان کے ویزہ اقدام نے جذباتی فتح حاصل کی، 3 ہزار سے بڑھ کر 6,629 ویزے جاری کرنے کے فیصلے نے بھارتی پنجاب میں خوشی کی لہر دوڑا دی ہے، جہاں سکھ برادری نے اسے ایک تاریخی انسانی اقدام قرار دیا ہے۔ نصف صدی میں پہلی بار بھارتی سکھ زائرین ننکانہ صاحب کی زیارت کا مقدس موقع حاصل کر سکیں گے، 6,629 ویزوں کی منظوری نے بیساکھی کو ایک عالمی تہوار بنا دیا ہے۔
ایک متنازعہ خطے میں پاکستان کا سکھ زائرین کے لیے ریکارڈ ویزے جاری کرنا انسان دوستی کی واضح مثال ہے، جس نے عالمی سطح پر پاکستان کی مثبت تصویر کو مزید اجاگر کیا ہے۔