27ویں ترمیم نہیں بلکہ کچھ ایکٹ آ رہے ہیں۔ طارق فضل چوہدری

اسلام آباد (پاک صحافت) طارق فضل چوہدری کا کہنا ہے کہ 27ویں آئینی ترمیم نہیں آرہی البتہ کچھ ایکٹ لائے جارہے ہیں۔

تفصیلات کے مطابق ن لیگی رہنما طارق فضل چوہدری نے کہا ہے کہ 26ویں ترمیم کے بعد کچھ ابہام ہے، جسے دور کرنے کے لیے جمعہ کو کچھ ایکٹ سادہ اکثریت سے پاس کروائے جائیں گے۔

انہوں نے مزید کہا کہ خدا کے لیے اسلام آباد پر بار بار چڑھائی نہ کریں، لوگ پریشان ہوتے ہیں۔

بیرسٹر علی ظفر نے کہا کہ حکومت 27ویں آئینی ترمیم ضرور لائے گی کیونکہ 26ویں آئینی ترمیم کا ان کا اصل مقصد پورا نہیں ہوا۔

ان کا کہنا تھا کہ حکومت سپریم کورٹ کو کنٹرول کرنا چاہتی ہے، 26ویں ترمیم سے کچھ خلا رہ گیا ہے، اس لیے 27ویں ترمیم نے آنا ہی آنا ہے۔