اسلام آباد (پاک صحافت) وزیراعظم شہباز شریف کا کہنا ہے کہ ادب سے درخواست کرنا چاہتا ہوں بیٹھ کر معاملات پر سوچنا ہوگا، فیصلہ کرنا ہے دھرنے، لانگ مارچ یا ترقی کرنی ہے؟۔
تفصیلات کے مطابق نیشنل ایکشن پلان کی ایپکس کمیٹی کے اجلاس سے خطاب کرتے ہوئے وزیراعظم شہبازشریف نے کہا کہ بعض معاملات پر ہمیں تفصیل سے بات کرنا ہوگی، ترقی، خوشحالی کیلئے معاشی، سیاسی استحکام ضروری ہے۔ کیا ملک اس وقت دھرنے، جلوس اور لانگ مارچ کا متحمل ہوسکتا ہے؟ ہمیں ملکی خوشحالی کے لیے مل بیٹھ کر فیصلے کرنا ہوں گے۔
وزیراعظم شہباز شریف کا مزید کہنا تھا کہ اللہ کے فضل سے معیشت آہستہ آہستہ استحکام کی طرف بڑھ رہی ہے، معیشت کی بہتری میں کوششوں پر تمام اداروں کے شکرگزار ہیں۔ ملک میں بیرونی سرمایہ کاری حکومت کی ترجیح ہے، آئی ایم ایف پروگرام کے لیے تعاون پر صوبوں کا شکریہ ادا کرتا ہوں، آئی ایم ایف کا یہ آخری پروگرام ہوگا، اس کے لیے سب کو محنت اور کوشش کرنا ہوگی۔
انہوں نے کہا کہ معاشی بہتری، ترقی اور سیاسی استحکام ایک دوسرے منسلک ہیں، مہنگائی سنگل ڈیجیٹ پر آگئی ہے، سٹاک مارکیٹ تاریخ کی نئی بلندیوں کو چھو رہی ہے، میرے ساتھ سب نے ہاتھ بٹانا ہے، ترقی تب ہوگی جب ملک میں اندرونی اور بیرونی سرمایہ کاری ہو۔
وزیر اعظم نے کہا کہ ملکی ترقی کے لیے وفاق اور صوبوں کو مل کر کام کرنا ہوگا، اہم پہلو ملک کی ترقی اور خوشحالی ہے، ایف بی آر میں اصلاحات کا عمل جاری ہے۔