اسلام آباد (پاک صحافت) چیئرمین سینیٹ آف پاکستان، مقام صدر یوسف رضا گیلانی نے کہا ہے کہ ہمیں اپنے سائنسدانوں اور انجینئرز کی شب و روز محنت کا اعتراف کرنا ہو گا۔ انہوں نے یومِ تکبیر پر اپنے پیغام میں کہا ہے کہ شہید ذوالفقار علی بھٹو کی کی کوششوں سے پاکستان ایٹمی ریاست بنا۔
یوسف رضا گیلانی کا کہنا ہے کہ ہمیں ایٹمی ریاست بننے کے سفر میں کئی مشکلات کا سامنا کرنا پڑا۔ ان سے قبل نائب صدر پیپلز پارٹی و سینیٹر شیری رحمٰن کا کہنا تھا کہ ذوالفقار علی بھٹو کے وژن کی بدولت پاکستان نیوکلیئر ممالک کی فہرست میں شامل ہوا۔ انہوں نے یومِ تکبیر کے موقع پر اپنے پیغام میں کہا ہے کہ بانیٔ نیوکلیئر پروگرام ذوالفقار علی بھٹو اور بانیٔ میزائل پروگرام محترمہ بینظیر بھٹو کو سلام پیش کرتی ہوں۔
شیری رحمٰن نے پوری قوم کو یوم تکبیر کی مبارکباد پیش دیتے ہوئے اپنے پیغام میں کہا کہ بھٹو نے پاکستان کے دفاع کو ناقابلِ تسخیر بنانے کے لیے جوہری پروگرام کی بنیاد رکھی، انہوں نے عالمی دباؤ اور دھمکیوں کے باجود پاکستان کے جوہری پروگرام کو آگے بڑھایا۔