اسلام آباد (پاک صحافت) احسن اقبال کا کہنا ہے کہ گوادر ایئرپورٹ اور سی پیک 2 سے خوشحالی کی نئی راہیں کھلیں گی۔
تفصیلات کے مطابق وفاقی وزیر برائے منصوبہ بندی و ترقی احسن اقبال نے کہا ہے کہ چینی وزیراعظم گیارہ سال بعد پاکستان کا دورہ کر رہے ہیں، ہم چین کی مدد سے سی پیک 2 شروع کرنے جا رہے ہیں۔ چین کے تعاون سے مستقبل قریب میں پانچ اقتصادی راہداری بھی کھولی جائیں گی، بلوچستان کے لوگوں کے لئے کاروباری سرگرمیاں بڑھانے کے لئے گوادر میں کارگو ہب قائم کیا جا سکتا ہے۔
وفاقی وزیر احسن اقبال نے علاقائی رابطے کے لئے شنگھائی تعاون تنظیم کے کردار پر تبصرہ کرتے ہوئے کہا کہ ریل اور سڑک کے رابطے وسطی ایشیائی ریاستوں اور یورپ کے ساتھ کاروباری تعلقات کو مضبوط بنائیں گے۔
ایک سوال کے جواب میں انہوں نے کہا کہ خطے کے اس حصے میں اقتصادی سرگرمیوں کو بڑھانے کے لئے گوادر اور عمان کے روٹس کو بحال کیا جا سکتا ہے۔