اسلام آباد (پاک صحافت) ملک میں کورونا وائرس کے وار جاری ہیں، تاہم کچھ دنوں سے وبا کے حملوں میں شدت آگئی ہے، نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران کورونا وائرس سے مزید 100 افراد دم توڑ گئے، جس کے بعد کورونا وائرس سے مرنے والوں کی مجموعی تعداد 25 ہزار 320 تک جا پہنچی ہے۔
تفصیلات کے مطابق گزشتہ 24 گھنٹوں کے دوران ملک بھر میں کورونا کے 61 ہزار 446 ٹیسٹ کیے گئے جن میں سے 4553 افراد میں کورونا وائرس کی تصدیق ہوئی، جس کے بعد ملک میں کورونا وائرس کے مصدقہ کیسز کی مجموعی تعداد 11 لاکھ 40 ہزار 411 تک جاپہنچی ہے۔
واضح رہے کہ سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 7.4 فیصد رہی۔ این سی او سی کے مطابق 24 گھنٹوں کے دوران ملک بھر میں 3413 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 10 لاکھ 22 ہزار 847 ہو گئی ہے جب کہ فعال کیسز کی تعداد 92244 ہے۔