سیالکوٹ (پاک صحافت) وزیر دفاع خواجہ محمد آصف نے کہا کہ سیاست دان سیاسی اختلافات حل کرتے ہیں، کوئی سوچ نہیں سکتا تھا کہ مہنگائی کی شرح کم ہو کر ڈیڑھ فیصد پر آجائے گی۔
تفصیلات کے مطابق میڈیا سے گفتگو کرتے ہوئے خواجہ محمد آصف نے کہا کہ کل امریکہ کی سٹاک مارکیٹ کریش کر گئی جبکہ پاکستان سٹاک ایکسچینج ایک لاکھ 20 ہزار کا ہندسہ عبور کر گئی۔ بانی پی ٹی آئی جیب کترا تھا۔ میں اسمبلی میں اس کے ساتھیوں سے کہتا تھا کہ اس کی جیب سے پیسے نہ نکل آئے تو معافی مانگ لوں گا، بانی اب کہتا ہے جب تک مجھے نہیں لے کر جائیں گے تب تک میری پارٹی میٹنگ میں شامل نہیں ہوگی۔
خواجہ آصف کا مزید کہنا تھا کہ پرسوں صارفین کو 16 سے 17 فیصد بجلی پر رعایت دی گئی ہے، مریم نواز پنجاب کو دن رات چار چاند لگا رہی ہیں۔ آئندہ ماہ میں اس ضلع کی صورتحال تبدیل ہو جائے گی، جون تک سیالکوٹ کھاریاں موٹروے شروع ہو جائے گی، سیالکوٹ میں رنگ روڈ زیر تعمیر ہے، نوازشریف جب بھی آئے گا ترقی کے دور کا آغاز ہوگا، ہمارے ساتھی اپنی لیڈر شپ کے زیر قیادت کام کر رہے ہیں۔
انہوں نے کہا کہ کے پی اور بلوچستان دہشت گردی کی زد میں ہیں، پاک افواج قربانیاں دے کر ملک کی حفاظت کر رہی ہیں، میں بھی قید میں تھا لیکن اب تو ملاقاتیں اور پریس کانفرنسز ہو رہی ہیں، ترقی کا سفر اب اس ملک میں جاری رہے گا۔