اسلام آباد (پاک صحافت) کشمیر حریت رہنما یاسین ملک کی اہلیہ مشال ملک نے کہا ہے کہ مقبوضہ کشمیر کی خواتین کو سلام جو آزادی کیلئے سب کچھ قربان کر چکی ہیں۔
تفصیلات کے مطابق یوم خواتین پر اپنے ایک پیغام میں مشال ملک کا کہنا تھا کہ آج خواتین کا دن مناتے ہوئے آنکھوں کے سامنے مظلوم، لاچار کشمیری بہنیں ہیں، کشمیر کی خواتین کو سلام جو آزادی کے لیے سب کچھ قربان کرچکی ہیں، یہی خواتین ہماری ہیرو ہیں اور ان سے ہی قومیں وجود میں آتی ہیں۔
ذرائع کے مطابق مشال ملک کا مزید کہنا تھا کہ دنیا آج خواتین کے عالمی دن پر مقبوضہ کشمیر کی خواتین کو نہ بھولے، خواتین کے کارناموں کی بات ہو رہی ہے وہیں مقبوضہ کشمیر کی مظلوم عورت بھی توجہ چاہتی ہے، ہزاروں خواتین زندگی سے گئیں، ہزاروں کے سہاگ اجڑ گئے، لاکھوں کی عزت قربان، بیٹیاں مائیں درندگی کا نشانہ بن گئیں۔
انہوں نے کہا کہ ان خواتین بارے بات نہ کرنا خواتین کے حقوق کے عالمی علمبرداروں کے منہ پر طمانچہ ہے ، دنیا میں حقوق کے دن تو منائے جاتے ہیں مگر کیا مقبوضہ کشمیر کی خواتین دنیا کا حصہ نہیں۔