اسلام آباد (پاک صحافت) علی امین گنڈا پور کے نیشنل ایپکس کمیٹی میں 26 نومبر کا معاملہ اٹھانے کے دعوی پر وفاقی وزیر احسن اقبال کا ردِ عمل سامنے آگیا۔
تفصیلات کے مطابق وفاقی وزیر منصوبہ بندی احسن اقبال نے کہا ہے کہ ایک ضابطہ کار ہے کہ ایپکس کمیٹی اجلاس کی کارروائی خفیہ ہوتی ہے، کسی کو بھی ایپکس کمیٹی کی کارروائی پر تبصرہ نہیں کرنا چاہئے۔ علی امین گنڈاپور ہمارے محترم ہیں، ان کی مشکل کا ہمیں احساس ہے، امین گنڈاپور کو دو کشتیوں میں چلنا پڑتا ہے۔
ذرائع کے مطابق رہنما مسلم لیگ ن کا کہنا تھا کہ ایک طرف وزیر اعلی، دوسری طرف اپنی پارٹی کو بھی خوش رکھنا ہے، کچھ بیانات سیاسی ہوتے ہیں اور کچھ کام ہوتا ہے جو سرکاری ہوتا ہے۔
احسن اقبال سے صحافی نے سوال کیا کہ کیا تحریک انصاف کے دونوں مطالبات جائز ہیں، جس پر انہوں نے کہا کہ پی ٹی آئی کے مطالبات جائز ہیں یا نہیں فیصلہ مذاکراتی کمیٹی کرے گی۔