اسلام آباد (پاک صحافت) عالمی دہشتگرد تنظیم داعش نے کابل میں پاکستانی سفارتخانے پر حملے کی ذمہ داری قبول کی ہے۔
تفصیلات کے مطابق افغانستان کیلئے پاکستان کے نمائندہ خصوصی محمد صادق نے کہا ہے کہ داعش نے کابل میں پاکستانی سفارتخانے پر حملے کی ذمہ داری قبول کی ہے۔ آزادانہ اور افغان حکام کے ساتھ مل کر ان اطلاعات کی تصدیق کررہے ہیں اور تحقیقات کا سلسلہ جاری ہے۔
محمد صادق کا مزید کہنا ہے کہ خطے اور افغانستان کے امن و استحکام کو دہشت گردی کا خطرہ لاحق ہے، ہم سب کو مل کر دہشت گردی کی اس لعنت کو شکست دینی ہے۔ انہوں نے کہا کہ پاکستان دہشت گردی کے خلاف جنگ کے لیے اپنے عزم پر قائم ہے۔ خیال رہے کہ 2 دسمبر کو افغان دارالحکومت کابل میں پاکستانی ناظم الامور پر قاتلانہ حملہ ہوا جس میں سکیورٹی گارڈ زخمی ہوگیا تھا۔
Short Link
Copied