پشاور (پاک صحافت) چینی سیاحوں کا خیبرپختونخوا میں داخلہ روکنے پر گورنر فیصل کریم کنڈی نے برہمی کا اظہار کیا ہے۔
تفصیلات کے مطابق گورنر خیبرپختونخوا نے چینی سیاحوں کو صوبے میں داخل ہونے سے روکنے پر اعلی حکام سے رپورٹ طلب کرلی ہے۔
پولیس حکام کا کہنا ہے کہ غیرملکی سائیکل سواروں کو خیبرپختونخوا میں داخلے سے اس وقت روک دیا گیا جب وہ پنجاب سے نوشہرہ اور پھر پشاور آنا چا رہے تھے۔ پولیس حکام نے بتایا کہ این او سی نا ہونے پر سائیکل سواروں کو واپس بھجوا دیا گیا۔
گورنر خیبرپختونخوا فیصل کریم کنڈی نے کہا ہے کہ صوبائی حکومت اس عمل میں ملوث ہے، یہ صوبہ دشمنی نہیں ملک دشمنی ہے، تحریک انصاف روز اول سے پاک چین تعلقات کو تباہ کرنے کے درپے ہے۔
فیصل کریم کنڈی نے کہا کہ جو جماعت دہشت گردوں کو آباد کرتی ہے اور چین کے سیاحوں کو روکتی ہے اس کی ملک دشمنی شک سے بالاتر ہے۔ خیبرپختونخوا کی حکومت اپنے قائد اور اس کے آقاؤں کے اشاروں پر پاک چین دوستی کو متاثر کرنے میں مصروف ہے۔