لاہور (پاک صحافت) وزیرِ اعلیٰ پنجاب مریم نواز نے کہا ہے کہ جو لوگ دوسروں کو چور ڈاکو کہنے کا سبق دیتے ہیں وہ کسی کے خیر خواہ نہیں ہو سکتے۔ لاہور میں جشن اسٹیم کی تقریب سے خطاب میں مریم نواز نے کہا کہ کسی نے بچوں کے ہاتھ میں پیٹرول بم پکڑانے کی کوشش کی تھی، طلبہ وعدہ کریں ملک کے خلاف کوئی اقدام نہیں اٹھائیں گے، کسی کے ذاتی مقاصد کے لیے ایندھن مت بننا، کسی کے کہنے پر اپنی زندگی خراب نہ کرنا، کسی کے بہکاوے میں مت آنا۔
انہوں نے کہا کچھ روز قبل وزیرِ اعلیٰ خیبر پختون خوا نے مجھ پر ذاتی حملہ کیا، یہ لوگ مخالفین پر ذاتی حملے کرتے ہیں، ان کا کام ذاتیات پر حملہ کرنا نہیں عوام کی خدمت کرنا ہے۔ مریم نواز کا طلباء سے مخاطب ہوتے ہوئے کہنا ہے کہ بچوں، مجھے آپ پر بہت فخر ہے، آپ میں بہت صلاحیت ہے، تھوڑی سی توجہ سے آپ پوری دنیا فتح کر سکتے ہیں، سرکاری اسکولوں کا معیارِ تعلیم نجی اسکولوں سے بہت پیچھے ہے، سرکاری اسکولوں کے بچوں کی تھوڑی سی توجہ مثبت اثرات پیدا کرتی ہے۔
وزیرِ اعلیٰ پنجاب نے وعدہ کیا کہ ہر روز بچوں کے لیے کام کروں گی، پورے دل سے کوشش کروں گی کہ بچوں کے خواب پورے ہوں، جتنے بھی وسائل ہیں تمام آپ پر نچھاور کروں، مجھ سےجو ہو سکے گا میں کروں گی۔ انہوں نے مزید کہا کہ ہر وہ تنقید جو آپ کو بری لگتی ہے وہ آگے بڑھنے میں مدد دیتی ہے، میرے ساتھ بچوں کا پیار بعض لوگوں کو برداشت نہیں ہوتا، بچے مجھ سے جب محبت کا اظہار کرتے ہیں تو لوگوں کو لگتا ہے کہ سب پہلے سے ترتیب دیا ہوا ہے، 4 سال میں بچوں کو اسکالر شپس کیوں نہیں ملیں؟ اسکالر شپس کا حق پہلے ملا ہوتا تو آپ کہاں پہنچ چکے ہوتے۔