چمن میں حالات خراب کرنے کی سازش کامیاب نہیں ہوگی۔ وزیراعلی بلوچستان

کوئٹہ (پاک صحافت) وزیراعلی بلوچستان سرفراز بگٹی نے کہا ہے کہ چمن میں مظاہروں کی آڑ میں حالات خراب کرنے کی سازش کامیاب نہیں ہوگی۔

تفصیلات کے مطابق چمن کی صورتحال سے متعلق اجلاس سے خطاب کرتے ہوئے وزیراعلی بلوچستان سرفراز بگٹی نے کہا ہے کہ سیکیورٹی فورسز اور املاک پر حملہ ناقابل قبول ہے، قانون سے کوئی مبرا نہیں، قانون ہاتھ میں لینے سے گریز کیا جائے۔

انہوں نے کہا کہ پرامن احتجاج آئینی حق ہے، تشدد کی اجازت نہیں دی جاسکتی، ریاست کی رٹ ہر صورت برقرار رکھی جائے گی، حکومت صبر و تحمل سے کام لے رہی ہے۔

سرفراز بگٹی نے مزید کہا کہ چمن میں درپیش مشکلات اور مسائل گفت و شنید سے حل کرنے کےخواہاں ہیں، مقامی لوگوں کے خدشات دور کرکے مشکلات حل کرنے کی کوشش کریں گے۔