اسلام آباد (پاک صحافت) فیصل واوڈا نے پیشگوئی کی ہے کہ پی ٹی آئی کے مزید ٹکڑے ہوں گے۔
تفصیلات کے مطابق سابق وفاقی وزیر اور تحریک انصاف کے منحرف رہنما فیصل واوڈا نے کہا ہے کہ سابق چیئرمین پی ٹی آئی نے ان لوگوں پر اعتماد کیا جن پر نہیں کرنا چاہیے تھا، وہ خود کو بند گلی میں لے گئے ہیں اور نوازشریف کو انتخابات پلیٹ پر رکھ کر دے دیئے گئے۔
فیصل واوڈا کا مزید کہنا تھا کہ بد نصیبی ہے کہ اپنے ہاتھ سے اپنے گھر کو آگ لگا دی گئی سابق چیئرمین پی ٹی آئی کی قیادت میں پوری پارٹی متحد تھی تاہم اب بہت سارے دھڑوں میں تقسیم ہوچکی ہے۔ استحکام پاکستان اور پرویز خٹک کی پارٹی کے بعد پی ٹی آئی کے مزید ٹکڑے ہوں گے۔
انہوں نے کہا کہ وکلاء کے اندر 5 گروپ ہیں، پھر بیگم صاحبہ ہیں، پھر بہنیں ہیں، پھر ورکرز ہیں، پھر جو سیاستدان ہیں۔ ان میں سے کچھ اپنی جماعتیں بنائیں گے کچھ دوسری جماعتوں میں چلے جائیں گے، سابق چیئرمین ڈیل کا انتظار کررہے ہیں لیکن انہیں کوئی ڈیل آفر نہیں کی جارہی۔