اسلام آباد (پاک صحافت) وفاقی وزیر رانا تنویر حسین نے کہا کہ پی ٹی آئی مذاکرات میں کبھی سنجیدہ ہی نہیں تھی، پی ٹی آئی نے اپنے تحریری مطالبات دیئے لیکن جواب لینے سے پہلے بھاگ گئے۔
تفصیلات کے مطابق وفاقی وزیر رانا تنویر حسین نے کہا ہے کہ ان کی فطرت میں تخریب کاری اور فتنہ انگیزی ہے، 8 فروری کو صاف شفاف الیکشن ہوئے، ضلع شیخوپورہ میں شفاف الیکشن ہوئے اور زیادتی بھی ہمارے لوگوں کے ساتھ ہوئی۔ چند شرپسند عناصر ملے ہوئے ہیں ان کے ساتھ عوام نہیں ہے۔
رانا تنویر حسین کا مزید کہنا تھا کہ ہماری ایک سال کی کارکردگی عوام کے سامنے ہے، وزیراعظم میاں محمد شہباز شریف کی قیادت میں دن رات محنت کر کے ملکی معیشت بہتر کی ہے، عالمی ادارے بھی تسلیم کررہے ہیں کہ پاکستان کی معیشت بہتر ہو رہی ہے۔
انہوں نے کہا کہ اگلے سال مزید بہتری ہوگی اور عوام کے لئے خوشحالی آئے گی، پنجاب حکومت نے عوام کے لئے بے شمار منصوبے شروع کئے ہیں۔