اسلام آباد (پاک صحافت) رانا ثناءاللّٰہ نے کہا ہے کہ اپوزیشن جماعت تحریک انصاف سے اتوار سے مذاکرات کا آغاز ہوسکتا ہے۔
تفصیلات کے مطابق رانا ثناءاللّٰہ نے کہا کہ ہم جو بھی بات کریں گے وہ نواز شریف کی اجازت سے مشروط ہوں گے۔ حکومت پی ٹی آئی سے جوبات کرے گی وہ اسٹیبلشمنٹ کو آن بورڈ رکھ کر کرے گی۔ اسپیکر قومی اسمبلی سردار ایاز صادق کے ساتھ ہماری میٹنگ ہوئی ہے، مذاکرات کا آغاز اتوار تک ہوسکتا ہے۔
رانا ثناءاللہ کا مزید کہنا تھا کہ اگر ان کو سول نافرمانی کی تحریک چلانے کی جلدی ہے تو یہ اپنا شوق پورا کرلیں، اتوار تک تو ان کے مطالبات کے حوالے سے کچھ نہیں ہوسکتا ہے۔ وزیراعظم نے واضح طور پر ایوان میں کہا تھا کہ وہ ہر معاملے پر بات کرنے کےلیے تیار ہیں، ان لوگوں نے خود کو اور ملک کو نقصان پہنچایا ہے۔
انہوں نے کہا کہ سول نافرمانی کی تحریک سے ان کو کچھ حاصل نہیں ہوگا، بانی پی ٹی آئی کی سول نافرمانی تحریک ناکام ہوگی، اوورسیز پاکستانیز حکومت کو نہیں اپنے پیاروں کو پیسے بھیجتے ہیں۔
وزیراعظم کے مشیر نے کہا کہ سیاسی معاملات کو ڈائیلاگ کے ذریعے ہی حل کیا جاتا ہے، پی ٹی آئی معاملات کو سمجھنے سے عاری ہے، بانی پی ٹی آئی کی رہائی کی پیشکش نہیں کی گئی تھی۔