اسلام آباد (پاک صحافت) پاکستان تحریک انصاف (پی ٹی آئی) کے رہنما سینیٹر علی ظفر نے سپریم کورٹ پریکٹس اینڈ پروسیجر ایکٹ کے حق میں عدالتی فیصلے کو درست قرار دے دیا۔ انہوں نے کہا کہ چیف جسٹس قاضی فائز عیسیٰ نے خود کہا کہ وہ اپنے اختیارات منتقل کرنے کو تیار ہیں۔
تفصیلات کے مطابق نجی ٹی وی چینل کے پروگرام میں گفتگو کرتے ہوئے پی ٹی آئی رہنما سینیٹر علی ظفر نے کہا کہ اضی میں سپریم کورٹ نے آرٹیکل 184 تھری کے تحت ایسے معاملات میں مداخلت کی جو اسے نہیں کرنی چاہیے تھی، ایسے کچھ فیصلوں سے معیشت کو بھی نقصان پہنچا ہے۔
واضح رہے کہ سینیٹر علی ظفر نے مزید کہا کہ یہ خوش آئند بات ہے کہ اب چیف جسٹس آرٹیکل 184 تھری کے معاملے پر مشاورت سے فیصلہ کریں گے اور فیصلے کے خلاف اپیل بھی دائر ہوسکے گی۔ان کا کہنا تھا کہ یہ قانون پاناما کیس سمیت ماضی کے کیسز پر لاگو نہیں ہوگا، اس قانون کا کسی خاص شخصیت کو فائدہ نہیں ہوگا۔