اسلام آباد (پاک صحافت) عرفان صدیقی کا کہنا ہے کہ پی ٹی آئی کیساتھ کوئی نرمی نہیں برتی جائے گی اور نہ کوئی ڈیل ہوگی۔
تفصیلات کے مطابق سینیٹ میں پاکستان مسلم لیگ (ن) کے پارلیمانی لیڈر عرفان صدیقی نے کہا ہے کہ پی ٹی آئی سیاسی فائدے کے حصول کے لیے پروپیگنڈے اور سازشی نظریوں کو بروئے کار لانے کا ماضی رکھتی ہے۔
انہوں نے اس بات پر زور دیا کہ قانون کا اطلاق تمام قیدیوں پر یکساں طور پر کیا جائے گا، اس میں کوئی رعایت نہیں کی جائے گی، 9 مئی کے واقعے کا حوالہ دیتے ہوئے انہوں نے کہا کہ سیاست دانوں کو ملک میں عدم استحکام پیدا نہیں کرنا چاہیے، جیسا کہ پی ٹی آئی کا کردار رہا ہے۔
غیر جانب دار عدلیہ کی اہمیت پر زور دیتے ہوئے انہوں نے کہا کہ عدلیہ کو آئین و قانون کی بنیاد پر فیصلے کرنے چاہئیں اور امید ہے عدلیہ قانون پر عمل درآمد میں مساوات کا اصول برقرار رکھے گی اور اس امر کو یقینی بنائے گی کہ انصاف کی غیرجانب دارانہ اور شفاف فراہمی جاری رہے۔
انہوں نے کہا کہ پاکستان ترقی کر رہا ہے اور اس ترقی میں کسی قسم کی رکاوٹ برداشت نہیں کی جائے گی، پی ٹی آئی اجازت کے بغیر عوامی اجتماعات نہیں کر سکتی اور اگر انہوں نے اس اصول کی خلاف ورزی کی تو انہیں نتائج کا سامنا کرنا پڑے گا۔