اسلام آباد (پاک صحافت) شیری رحمان کا کہنا ہے کہ پیپلز پارٹی غیرجانبدار نگراں حکومت کے قیام کو ترجیح دیتی ہے۔
تفصیلات کے مطابق وفاقی وزیر ماحولیات شیری رحمان نے پریس کانفرنس سے خطاب کرتے ہوئے کہا ہے کہ نگراں وزیراعظم کے لیے کوئی نام پیپلز پارٹی کو نہ تو پیش کیا گیا اور نہ ہی ہم نے کسی نام پر اتفاق کیا ہے۔ نگراں حکومت کے لیے غیرجانبداری لازمی ہے، عام آدمی کمر توڑ مہنگائی کا سامنا کر رہا ہے، میڈیا کچھ ٹھوس خبروں پر بھی توجہ دے۔
شیری رحمان کا مزید کہنا تھا کہ نگراں حکومت کے حوالے سے قیاس آرائیاں چل رہی ہیں، نگراں وزیراعظم کا نام ضرور فائنل ہوگا فی الحال کچھ وقت ہے۔ پیپلز پارٹی صاف اور شفاف انتخابات میں یقین رکھتی ہے، نگراں وزیراعظم کا نام ضرور فائنل ہوگا، مگر ابھی مزید کچھ وقت درکار ہے۔
انہوں نے کہا کہ پیپلز پارٹی غیرجانبدار نگراں حکومت کے قیام کو ترجیح دیتی ہے، پی پی بروقت انتخابات کے حق میں ہے۔