کوئٹہ (پاک صحافت) میر ضیاءاللہ کا کہنا ہے کہ پاک فوج نے ملک و قوم کے لئے بے شمار قربانیاں دی ہیں جس کی وجہ سے ہی شہری محفوظ ہیں۔ پوری قوم اپنی بہادر افواج کے ساتھ کھڑی ہے۔
تفصیلات کے مطابق صوبائی مشیرداخلہ میر ضیاءاللہ لانگو نے میران شاہ میں سیکیورٹی فورسز پر خودکش دھماکے کی شدید الفاظ میں مذمت کی ہے۔ انہوں نے دھماکے میں شہید ہونے والوں کے لواحقین سے گہرے دکھ اور افسوس کا اظہار کرتے ہوئے کہا کہ دکھ کی اس گھڑی میں حکومت اور قوم شہداء کے اہل خانہ کے ساتھ ہیں۔
میر ضیاءاللہ لانگو کا مزید کہنا ہے کہ سیکورٹی فورسز اور بچوں کی شہادت کا واقعہ انتہائی دلخراش ہے، ملک و قوم کی حفاظت کے لئے پاک فوج کی لازوال قربانیوں پر خراج تحسین پیش کرتے ہیں۔ انہوں نے کہا کہ دشمن نہیں چاہتے کہ پاکستان ترقی و خوشحالی کی راہ پر گامزن ہو، معصوم بچوں کو شہید کرنا کہاں کی انسانیت ہے؟۔