لاہور (پاک صحافت) وزیراعلی پنجاب مریم نواز نے صوبے میں 450 کلو میٹر طویل 3 نئے روڈ کوریڈور تعمیر کرنے کی منظوری دے دی۔
تفصیلات کے مطابق تینوں کوریڈور ایشین ڈویلپمنٹ بینک اور حکومت پنجاب کے اشتراک کار سے مکمل کیے جائیں گے، 210 ارب روپے کی لاگت سے تینوں پراجیکٹ دسمبر 2025ء تک مکمل ہوں گے۔ وزیر اعلی نے خصوصی اجلاس میں 3 ماہ میں نئے روڈ کوریڈور پر تعمیرات آغاز کرنے کا حکم دیا ہے۔
ذرائع کے مطابق ساہیوال سے چیچہ وطنی اور رجانہ سے لیہ تک دو رویہ سڑک بنائی جائے گی، دیپالپور سے وہاڑی تک سنگل روڈ کو دو رویہ سڑک میں بدل دیا جائے گا اور شور کوٹ جھنگ چراغ والی تک نئی دو رویہ سڑک بنائی جائے گی۔
مریم نواز نے کہا کہ بڑے شہروں کو منسلک کرنے والے روڈ کوریڈورز سے عوام کو آمد و رفت میں آسانی ہوگی، پراجیکٹ نہ صرف سفری مشکلات کو کم کرے گا بلکہ معاشی ترقی میں بھی اہم کردار ادا کرے گا۔