لاہور (پاک صحافت) امن و امان برقرار رکھنے کے پیش نظر صوبہ پنجاب اور بلوچستان میں 8 فروری کو دفعہ 144 نافذ کر دی ہے، جس کے بعد دونوں صوبوں میں کسی بھی طرح کے دھرنے، جلسےاور جلوسوں پر پابندی عائد ہوگی ہے۔
تفصیلات کے مطابق ہوم ڈپارٹمنٹ حکومت پنجاب کی جانب سے سوشل میڈیا پلیٹ فارم ’ایکس‘ کی گئی ٹوئٹ کے مطابق پنجاب میں ہفتہ 8 فروری کو ہر قسم کے سیاسی احتجاج، جلسے، جلوس، ریلیوں، دھرنوں اور ایسی تمام سرگرمیوں پر پابندی عائد کردی گئی۔ ہوم ڈپارٹمنٹ کے مطابق سکیورٹی خطرات کے پیش نظر عوامی جلوس و دھرنا دہشتگردوں کے لیے سافٹ ٹارگٹ ہوسکتا ہے اور شرپسند عناصر عوامی احتجاج کا فائدہ اٹھا کر اپنے مذموم عزائم کی تکمیل کے لیے ریاست مخالف سرگرمیاں کرسکتے ہیں۔
ذرائع کے مطابق ہوم ڈپارٹمنٹ کی ٹوئٹ کے مطابق میں دفعہ 144 کے نفاذ کا فیصلہ کابینہ کمیٹی برائے امن و امان اور صوبائی انٹیلیجنس کمیٹی کی سفارش پر کیا گیا۔ دوسری جانب محکمہ داخلہ حکومت بلوچستان نے بھی صوبہ بھر میں دفعہ 144 نافذ کردی ہے، جس کا باضابطہ نوٹیفکیشن جاری کردیا گیا۔
ترجمان بلوچستان حکومت کے مطابق اسلحے کی نمائش اور استعمال پر مکمل پابندی عائد ہوگی، حکم فوری طور پر نافذ العمل ہوگا، دھرنوں، جلوسوں اور 5 سے زائد افراد کے اجتماعات پر 15 دن کے لئے پابندی عائد کردی گئی۔