پشین جلسے سے پی ٹی آئی کی بلی تھیلے سے باہر آگئی۔ اسلم غوری

اسلام آباد (پاک صحافت) اسلم غوری کا کہنا ہے کہ پشین جلسے سے پی ٹی آئی کی بلی تھیلے سے باہر آگئی ہے۔

تفصیلات کے مطابق جمعیت علمائے اسلام کے ترجمان اسلم غوری نے کہا ہے کہ پشین جلسے میں منہ میں رام رام اور بغل میں چھری کی اصل حقیقت عوام نے خود دیکھ لی۔ اپوزیشن کو شیر افضل مروت جیسوں کو پٹا ڈالنا ہوگا، محمود خان اچکزئی نے کہا تھا جلسے میں کسی کو گالی نہیں دیں گے۔

اسلم غوری کا مزید کہنا تھا کہ مگر لگتا ہے ان کی سیاست صرف سیاسی قائدین کو شیر افضل جیسے لوگوں سے گالیاں دلوانا ہے۔ شیر افضل جیسے لوگ پی ٹی آئی کے تابوت میں آخری کیل ٹھونک رہے ہیں، ناکام جلسے کو شاید ایسے نعرے لگوا کر میڈیا اور عوام کی توجہ کا مرکز بنایا جارہا ہے۔

انہوں نے کہا کہ پی ٹی آئی کو اقتدار سے نکالا، منہ کو لگام نہ دیا تو اپوزیشن کرنے کے جوگے بھی نہیں چھوڑیں گے۔