کراچی (پاک صحافت) گورنر سندھ کامران خان ٹیسوری نے کہا کہ پاک فوج پاکستان کی سلامتی، استحکام اور ترقی کی ضامن ہے، اگر آج ہماری فوج نہ ہوتی تو ہمارا حال عراق، لبنان اور شام سے بھی بدتر ہوتا۔
تفصیلات کے مطابق تقریب سے خطاب کرتے ہوئے گورنر سندھ کامران خان ٹیسوری نے کہا ہے کہ آرمی چیف جنرل سید عاصم منیر کا اصل کمال یہ دیکھیں کہ بیرونی سازشوں کے باوجود آج کسی میں اتنی جرأت نہیں کہ وہ پاکستان اور آزاد کشمیر کی ایک انچ زمین بھی لے سکے۔ پاک فوج اور ایس آئی ایف سی ملکی معیشت کے استحکام میں اہم کردار ادا کر رہے ہیں۔
کامران ٹیسوری کا مزید کہنا تھا کہ اوورسیز پاکستانی حقیقی سفیر ہیں، دنیا میں پاکستان کا مثبت چہرہ اجاگر کرنا آپ کی ذمہ داری ہے۔ پاکستان کی معیشت مستحکم ہو رہی ہے، ملک ہم سب کا ہے لہٰذا ہمیں ہر حال میں اس کے وقار اور عزت کا خیال رکھنا ہوگا۔ سپیشل انویسٹمنٹ فیسیلی ٹیشن کونسل (SIFC) کا قیام پاکستان میں سرمایہ کاری کے فروغ کے لیے ایک مثبت اقدام ہے۔
انہوں نے کہا کہ ہمارے سپہ سالار جنرل سید عاصم منیر نہ صرف ملک کی سرحدوں کی حفاظت کر رہے ہیں بلکہ معیشت کے استحکام کے لیے حکومت کی مدد بھی کر رہے ہیں۔