اسلام آباد (پاک صحافت) پاکستان اور ایران کے درمیان کشیدگی کے معاملے پر قومی سلامتی کمیٹی کا اجلاس کل دوپہر طلب کر لیا گیا ہے۔
تفصیلات کے مطابق قومی سلامتی کمیٹی کا اجلاس کل بلا لیا گیا ہے، اجلاس کی صدارت نگراں وزیراعظم کریں گے، جس میں حالیہ پاک ایران کشیدہ صورتحال کو زیر غور لایا جائے گا۔ اجلاس میں چیئرمین جوائنٹ چیفس آف سٹاف کمیٹی، آرمی چیف، نیول اور پاک فضائیہ کے چیف شریک ہوں گے جبکہ اجلاس میں خفیہ اداروں کے حکام بھی شریک ہوں گے۔
اس حوالے سے ذرائع کا کہنا ہے کہ قومی سلامتی کمیٹی کے اجلاس میں امن و امان کی صورتِ حال پر فیصلے ہوں گے۔ علاوہ ازیں پاکستان اور ایران کے درمیان جاری کشیدگی کے معاملے پر نگراں وزیراعظم نے کابینہ کا اجلاس بھی کل دوپہر 2 بجے طلب کیا ہے۔
ذرائع کے مطابق کابینہ اجلاس میں موجودہ ملکی سیکیورٹی کی صورتِ حال اور پاک ایران کشیدگی پر شرکاء کو بریفنگ دی جائے گی۔ کل ہونے والے اجلاس میں پاک ایران کشیدگی پر آئندہ کے لائحہ عمل پر بھی غور ہوگا۔