پاکستان کو ہندوستان کے مقابلے میں ترقی کی ریس میں جتوانا ہے۔ احسن اقبال

نارووال (پاک صحافت) وزیر پلاننگ اینڈ ڈیویلپمنٹ احسن اقبال نے کہا ہے کہ پاکستان کو ہندوستان کے مقابلے میں ترقی کی ریس میں جتوانا ہے۔

تفصیلات کے مطابق تقریب سے خطاب کرتے ہوئے احسن اقبال نے کہا ہے کہ پنجاب حکومت کی طرف سے 10 کروڑ کی لاگت سے یہاں منی سٹیڈیم تعمیر ہوگا، مسلم لیگ ن کا ایک ہی ایجنڈا ہے ترقی، مسلم لیگ ن جب بھی حکومت میں آتی ہے پاکستان کی ترقی کا پہیہ چلنے لگتا ہے۔ جب بھی ملک کو مسلم لیگ ن لیگ سے چھینا جاتا ہے تو ترقی کا پہیہ الٹا چلنے لگتا ہے۔

احسن اقبال کا مزید کہنا تھا کہ جو لوگ کہتے تھے نیا پاکستان بنائیں گے وہ پاکستان کو 4 سالوں میں اجاڑ گئے، ان کا نیا پاکستان اجڑا ہوا پاکستان تھا، ان کا نیا پاکستان نوجوانوں کے لئے بیروزگاری، غریبوں کے لئے جہنم کا پاکستان تھا۔ جب ان سے حکومت عوام نے عدم اعتماد کے ساتھ لی، پاکستان دیوالیہ ہونے والا تھا، اس حکومت کے بدلے ہمیں سخت فیصلے کرنے پڑے۔

انہوں نے کہا کہ مہنگائی کی شرح جو 38 فیصد سے بڑھ رہی تھی جو 4 فیصد سے کم آگئی ہے۔ یکم جولائی ساڑھے سات روپے بجلی یونٹ میں کمی ہوجائے گی، اب ہمیں اس ملک کے اندر کسی دھرنے، فساد، لانگ مارچ کی ضرورت نہیں ہے، ہمارا مقابلہ ہندوستان کے ساتھ ہے، ہندوستان کے مقابلے میں ترقی کی ریس میں جتوانا ہے، انشاءاللہ ہم اس ترقی ریس میں جیتے گے۔