اسلام آباد (پاک صحافت) نگراں وزیر خارجہ کا کہنا ہے کہ پاکستان کشمیریوں کی اخلاقی، سیاسی اور سفارتی حمایت جاری رکھے گا۔
تفصیلات کے مطابق نگراں وزیر خارجہ جلیل عباس جیلانی نے یوم حق خود ارادیت کے موقع پر اپنے پیغام میں کہا ہے کہ 5 جنوری جموں و کشمیر کے عوام کے لیے یوم حق خود ارادیت کے طور پر منایا جاتا ہے، حق خود ارادیت بین الاقوامی قانون کا ایک بنیادی اصول ہے۔ کشمیری عوام اس ناقابل تنسیخ حق کو استعمال نہیں کر سکے۔
جلیل عباس جیلانی کا مزید کہنا تھا کہ بھارت کشمیر پر اپنے قبضے کو مستحکم کرنے کے لیے متعدد اقدامات کررہا ہے، مقبوضہ کشمیر ایک بین الاقوامی سطح پر تسلیم شدہ متنازعہ علاقہ ہے، بھارتی سپریم کورٹ کا فیصلہ کشمیریوں کے حق کو سلب کرنے کی بھارتی خواہش کا مظہر ہے۔
انہوں نے کہا کہ بھارت کشمیریوں کو انسانی حقوق کی منظم خلاف ورزیوں کا نشانہ بھی بنا رہا ہے، عالمی برادری کو کشمیری عوام کے حقوق کی بحالی کا بھی مطالبہ کرنا چاہیئے، پاکستان کشمیریوں کی بلاامتیاز اخلاقی، سیاسی اور سفارتی حمایت جاری رکھے گا۔