paksahafat پاک صحافت
Related Articles
اسلام آباد (پاک صحافت) پاکستان نے اقوام متحدہ سے غزہ میں نسل کشی کو روکنے کیلئے فوری مداخلت کا مطالبہ کیا ہے۔
تفصیلات کے مطابق پاکستان کے مستقل نمائندہ سفیر منیر اکرم نے کہا ہے کہ غزہ میں نسل کشی کو روکنے کے لیے فوری مداخلت کی ضرورت سے زیادہ مناسب صورتحال کوئی نہیں ہے جہاں عالمی برادری امن بحال کرنے میں ناکام رہی ہے۔ اقوام متحدہ کے ہیڈکوارٹر میں جاری کردہ ایک الرٹ میں اقوام متحدہ کے انسانی حقوق کے کارکنوں نے خبردار کیا کہ جنوبی غزہ میں ”افراتفری اور خوف و ہراس“ پھیل رہا ہے، جہاں ایک اندازے کے مطابق 2 لاکھ 50 ہزار افراد خان یونس سے اسرائیلی فوج کے انخلا کے نئے احکامات سے متاثر ہونے والے ہیں۔
ذرائع کے مطابق اقوام متحدہ کی جنرل اسمبلی کے مباحثے کے دوران غزہ کی صورتحال پر خطاب کرتے ہوئے منیر اکرم نے بین الاقوامی برادری کے ردعمل پر سوال اٹھاتے ہوئے پوچھا کہ کچھ لوگ سلامتی کونسل کو جنگ بندی کا مطالبہ کرنے سے روکتے ہیں، جب کہ کچھ اسرائیل کو ہتھیار فراہم کرتے ہیں، یہاں تک کہ عالمی عدالت انصاف کی جانب سے اس قابل مذمت نسل کشی کو روکنے کے لیے کہا گیا ہے۔
انہوں نے کہا کہ قرارداد 2735 (غزہ میں جنگ بندی کا مطالبہ کیا گیا) پرعمل درآمد نہیں ہوا، اور اسرائیلی فوجی کارروائیاں بلا روک ٹوک جاری ہیں۔ کیا یہ ایسی صورت حال نہیں ہے جہاں نسل کشی کنونشن کے تحت کام کرنے والی سلامتی کونسل کوR2P نظریے سے تقویت ملی، غزہ کے متاثرین کو تحفظ فراہم کرنے کے لیے مداخلت کرنی چاہیے؟۔
