پشاور (پاک صحافت) پاکستان نے روس کے ساتھ منسلک ہونے اور دونوں ممالک کو ریلوے نیٹ ورک کے ذریعے جوڑنے اور امریکی پابندیوں کے خطرے سے بچنے کے لیے تجارتی راستوں کو محفوظ بنانے کے لیے ایک اسٹریٹجک روڈ میپ کا خاکہ تیار کرنے کا فیصلہ کیا ہے۔
تفصیلات کے مطابق ایکسپریس ٹریبیون کی رپورٹ کے مطابق پاکستان کی حکومت تین جہتی حکمت عملی تیار کر رہی ہے جس میں حکومت سے حکومت (جی ٹو جی) فریم ورک اور پروجیکٹس، تجارت اور سرمایہ کاری کو فروغ دینے کے لیے بزنس ٹو بزنس (بی ٹو بی) تعاون اور محفوظ تجارت کو یقینی بنانے کے طریقہ کار شامل ہیں۔ اس ضمن میں وزارت خارجہ نے اس تجویز کی توثیق کر دی ہے۔
دوسری جانب اسٹیٹ بینک آف پاکستان نے خبردار کیا ہے کہ روسی اداروں کے ساتھ کاروبار کرنا، جو پہلے ہی پابندیوں کی زد میں ہیں، چیلنجز کا باعث بن سکتے ہیں۔ تاہم، اس نے اس بات پر روشنی ڈالی کہ ترکی جیسے دیگر ممالک روس کے ساتھ مقامی کرنسیوں میں لین دین کر رہے ہیں۔
پلاننگ کمیشن میں ایک حالیہ میٹنگ کے دوران وزارت خارجہ کے حکام نے قابل عمل حکمت عملی اپنانے کی ضرورت پر زور دیا جو جلد ہی روس کا دورہ کرنے والے اعلی اختیاراتی وفد کے ذریعے اختیار کیا جا سکے۔
اس موقع پر سیکرٹری ریلوے نے روس اور وسطی ایشیائی ریاستوں کے ساتھ روابط استوار کرنے کے لیے تین اہم ریل روٹس کا خاکہ پیش کیا۔