کراچی (پاک صحافت) پانی کی قلت کے معاملے پر سندھ حکومت نے وزیر اعلیٰ پنجاب عثمان بزدار کی پیشکش ٹھکرادی، ذرائع کے مطابق وزیر اعلٰی پنجاب عثمان بزدار کی جانب سے سندھ حکومت کے ارکان اور ماہرین کو پنجاب کے بیراجز کے دورے کی پیشکش کی دی گئی تھی، جس پروزیر زراعت سندھ سہیل انور سیال نے جواب دیتے ہوئے کہا کہ سندھ کے ارکان اسمبلی پنجاب کے بیراجز کا دورہ نہیں کریں گے۔
تفصیلات کے مطابق وزیر زراعت سندھ سہیل انور سیال نے وزیر اعلیٰ پنجاب عثمان بزدار کو جواب دیتے ہوئے کہا کہ پانی کے معاملے پر ہمارا احتجاج اور شکوہ انڈس ریور سسٹم اتھارٹی (ارسا) سے ہے، ہمیں پنجاب کے دورے کی ضرورت ہی نہیں۔ خیال رہے کہ انہوں نے ساتھ ہی عثمان بزدارکو مخاطب کرتے ہوئے کہا کہ وزیراعلیٰ پنجاب چشمہ جہلم لنک کینال، ٹی پی لنک کینال میں پانی چھوڑنے کا جواب دیں۔
واضح رہے کہ صوبائی وزیر سہیل انور سیال نے عثمان بزدار کے جواب میں پنجاب کے ماہرین کو سندھ کے دورے کی پیشکش کردی۔دوسری طرف محکمہ آب پاشی سندھ نے دعوی ٰ سے کہا کہ پنجاب میں غیر قانونی طور پر لنک کینال کھولے گئے، جس سے سندھ کو 3 ارب ڈالر کا نقصان ہوا۔ محکمہ آب پاشی کے مطابق سندھ کو رواں سیزن میں 33 اعشاریہ ایم اے ایف پانی ملنا چاہیے تھا جبکہ 30 اعشاریہ ایم اے ایف پی پانی دیا گیا۔