لاہور (پاک صحافت) وزیراعلی پنجاب مریم نواز نے کہا ہے کہ ویٹ لینڈز ماحولیاتی تبدیلیوں کے خلاف دفاع ہے،اس کا تحفظ ماحولیاتی بقا کے لیے ناگزیر ہے۔
تفصیلات کے مطابق ورلڈ ویٹ لینڈز ڈے پر اپنے ایک پیغام میں وزیراعلی پنجاب مریم نواز نے کہا ہے کہ ویٹ لینڈز ہماری زمین کے پھیپھڑے کہلاتے ہیں اور آبی و جنگلی حیات کے مسکن ہیں، ویٹ لینڈز زمینی پانی کی سطح کو برقرار رکھتے اور کاربن جذب کرتے ہیں، سیلاب بھی کنٹرول کرتے ہیں۔
مریم نواز کا مزید کہنا تھا کہ پنجاب حکومت نے ملکی تاریخ میں پہلی بار جامع ’’کلائمیٹ پالیسی‘‘ تشکیل دی ہے، کلائمیٹ پالیسی کے تحت ویٹ لینڈز اور دیگر قدرتی نظام کے تحفظ اور بحالی کو اولین ترجیح دی جا رہی ہے، ویٹ لینڈز اور دیگر قدرتی خزانوں کی نگرانی کے لیے واچ ٹاورز اور چیک پوسٹوں کی تعمیر کی جاری ہے۔
انہوں نے کہا کہ ویٹ لینڈز اور دیگر قدرتی مسکن پر تفریحی اور تحقیقی مقاصد کے لیے مخصوص سہولیات کی فراہمی یقینی بنا رہے ہیں، ماہی گیری کے نظام کو منظم کیا گیا ہے، خلاف ورزی پر سزائیں دی جا رہی ہیں، ایسے کسی بھی عمل کی اجازت نہیں دی جائے گی جو ویٹ لینڈ یا دیگر علاقوں کےقدرتی توازن کو نقصان پہنچا سکے۔