اسلام آباد (پاک صحافت) وفاقی وزیر ریلوے اعظم سواتی کو توہین عدالت کا نوٹس جاری کر دیا گیا ہے، خیال رہے کہ وزیر ریلوے کے حکم پر عدالتی حکم کی دھجیاں اڑاتے ہوئے حکم امتناع کے باوجود اضاخیل ڈرائی پورٹ پشاور کی ٹھیکیدار کمپنی کو زبردستی بے دخل کردیا گیا تھا، جس پر عدالت کی جانب سے انہیں توہین عدالت کا نوٹس جاری کیا گیا ہے۔
تفصیلات کے مطابق عدالتی حکم امتناع کے باوجود قطری کمپنی الزاہد ہیوی اکیوپمنٹ کو اضاخیل ڈرائی پورٹ پشاور سے زبردستی بے دخل کرنے پر وفاقی وزیر ریلوے اعظم سواتی سمیت ریلوے کے اعلی حکام کو توہین عدالت کا نوٹس جاری کر دیا گیا۔ خیال رہے کہ قطر کی کمپنی الزاہد ہیوی اکویپمنٹ نے پشاور کی اضاخیل ڈرائی پورٹ کا ٹھیکہ گزشتہ برس بذریعہ ٹینڈر تین سال کیلئے حاصل کیا تھا۔ ایک سال پورا ہونے کے بعد ریلوے کی جانب سے اچانک نیا ٹینڈر جاری کردیا گیا جو قوانین کی خلاف ورزی ہے۔
واضح رہے کہ قطری کمپنی سے ایک کروڑ سے زائد کی رقم بھی وصول کی گئی لیکن اس کے باوجود اسے اضا خیل ڈرائی پورٹ سے بے دخل کیا جاچکا ہے۔ یاد رہے کہ لاہور کی ڈرائی پورٹ کے معاملے میں بھی ایسا ہی قدم اٹھایا گیا تھا ۔ یہاں پرانی ٹھیکیدار کمپنی کو ہٹا کر غیر قانونی ٹینڈر کے ذریعے وزیر ریلوے کے مبینہ فرنٹ مین عرفان اللہ اینڈ کمپنی کو نوازنے کی کوشش کی گئی۔ جب یہ معاملہ میڈیا میں اٹھا تو ریلوے حکام نے اپنا فیصلہ واپس لے لیا۔