کراچی (پاک صحافت) وزیراعلی سندھ مراد علی شاہ نے برطانیہ کے شاہ چارلس سوم کی 76ویں سالگرہ کی تقریب میں شرکت کی۔
تفصیلات کے مطابق تقریب سے خطاب کرتے ہوئے وزیراعلی سندھ مراد علی شاہ نے کہا کہ شاندار تقریب میں مدعو کرنے کا شکریہ جو ہمیں موسیقی، آرٹ اور دوستی سے جوڑتی ہے، سندھ ہزاروں سال سے موسیقی، شاعری اور آرٹ پر مشتمل ثقافت کی دھرتی ہے، ہمارے ورثے کو دنیا بھر میں پھرنے والے فنکاروں نے زندہ رکھا ہے۔
مراد علی شاہ کا کہنا تھا کہ لیجنڈ گلوکارہ عابدہ پروین سے لیکر عظیم لوک فنکار الن فقیر تک ہمارے فنکاروں نے دنیا میں اپنی پہچان چھوڑی ہے، سندھ نے ایسے فنکار پیدا کیے ہیں جنہوں نے سرحدوں سے ماورا لوگوں کے دلوں کو چھوا، حکومت اور سندھ کے عوام اپنے ثقافتی ورثے کو مناتے اور تحفظ کرتے ہیں۔
وزیراعلی نے کہا ایسی کوششوں کا مقصد سندھ کی زرخیر روایتوں کو اگلی نسلوں تک منتقل کرنا ہوتا ہے، برطانیہ اور سندھ دونوں میں تخلیقی روایات یکساں ہیں جنہوں نے عالمی میوزک اور آرٹ کو نئی شکل دی۔