کراچی (پاک صحافت) وزیراعلی سندھ سید مراد علی شاہ نے کورونا ایس او پیز کی رعایت نہ کرنے والے متعدد دفاتر کو سیل کرنے کے احکامات جاری کردئے ہیں۔
تفصیلات کے مطابق کورونا ٹاسک فورس کا اجلاس وزیراعلی سندھ سید مراد علی شاہ کی صدارت میں منعقد ہوا۔ جس میں صوبائی وزراء سید ناصر حسین شاہ، سعید غنی اور عذرا پیچوہو سمیت دیگر نے شرکت کی۔ اجلاس سے خطاب کرتے ہوئے سید مراد علی شاہ نے کہا کہ کاروبار کے اوقات کارکو صبح 6 سے شام 6 بجے تک یقینی بنایا جائے۔
وزیراعلی سندھ کا مزید کہنا تھا کہ مکمل لاک ڈاؤن سے بچنا ہے تو ایس او پیز پر عمل کرنا ہوگا، کچھ نجی دفاتر ایس او پیز اور اسٹاف کم کرنے کے فیصلے پر عمل نہیں کررہے، ایسے دفاتر کو سیل کیا جائے۔ وزیراعلیٰ سندھ نے انٹر سٹی بس ٹرانسپورٹ پر سختی سے عمل کرانے کی ہدایت کرتے ہوئے کہا کہ دیگر صوبوں سے بھی پبلک ٹرانسپورٹ کا سندھ میں داخلہ منع ہے، اگر کسی صوبے سے کوئی مسافر گاڑی آبھی گئی تو واپس جانے نہ دیں۔