لاہور (پاک صحافت) وزیراعلی پنجاب مریم نواز نے کہا ہے کہ وزیراعظم شہباز شریف نے دن رات کام کر کے ملک کو ڈیفالٹ کے خطرے سے نکالا۔
تفصیلات کے مطابق آسان کاروبار فنانس اور آسان کاروبار کارڈ کی افتتاحی تقریب سے خطاب کرتے ہوئے وزیراعلی پنجاب مریم نواز نے کہا ہے کہ لوگ کہہ رہے تھے ملک ڈیفالٹ کرجائے گا، اب تمام اکنامک انڈیکیٹرز بہتری کی جانب گامزن ہیں، سٹاک مارکیٹ نے تاریخی ریکارڈ توڑا ہے، دنیا کے سرمایہ کار پاکستان کی طرف دیکھ رہے ہیں۔
مریم نواز کا مزید کہنا تھا کہ وزیراعظم نے کل اعلان کیا بجلی کی قیمت 11 روپے مزید کم ہوگی، دنیا کے ماڈلز کی سٹڈی کرتی ہوں، کسی ملک نے انڈسٹریلائزیشن کے بغیر ترقی نہیں کی، ہمیں بھی انڈسٹریلائزیشن کی طرف جانا ہے، آج شاندار پیکیج لیکر پنجاب کےعوام کے سامنے آئی ہوں، آج وزیراعلیٰ آسان کاروبار فنانس ،وزیراعلیٰ آسان کاروبار کارڈ لارہے ہیں۔
انہوں نے کہا کہ منصوبے کے تحت آپ کو 3 کروڑ روپے تک کا بلاسود قرضہ ملے گا، ہم نے آپ کے لیے بزنس پلان بھی بنادیئے ہیں، ہم آپ کیلئے ہینڈ ہولڈنگ کا سسٹم بھی ڈویلپ کررہے ہیں، آپ آج پیسے لے لیں اور کل اپنا کاروبار شروع کردیں، چھوٹی فیکٹری یا پلانٹ لگانے کیلئے زمین رعایت پر دیں گے۔
وزیراعلی پنجاب کا کہنا تھا کہ آپ زمین کا ٹکڑا لے کر اپنا کاروبار شروع کرسکتے ہیں، یہ سکیم ان نوجوانوں کیلئے ہے جو اپنا کاروبار کرنا چاہتے ہیں، پاکستان میں پنک سالٹ کی کانیں ہیں،خزانہ ہے، دوسرے ممالک پاکستان کے نمک کو بیچ کر منافع کماتے ہیں، پنک سالٹ کے کاروبار میں بھی بہت وسائل ہیں۔