اسلام آباد (پاک صحافت) قومی اقتصادی کونسل کی ایگزیکٹیو کمیٹی کے اجلاس میں وزیراعظم لیپ ٹاپ اسکیم کے لیے 16 ارب 80 کروڑ روپے کی منظوری دے دی گئی۔
تفصیلات کے مطابق وزیر خزانہ سینیٹر اسحاق ڈار کی زیر صدارت اجلاس ہوا، جس میں کئی بڑے منصوبوں کی منظوری دی گئی ہے۔ اجلاس کے اعلامیے کے مطابق وزیراعظم لیپ ٹاپ اسکیم کے لیے 16 ارب 80 کروڑ روپے کی منظوری دی گئی، یہ اسکیم مرکزی حکومت کی فنانسنگ سے 2 سال میں مکمل ہوگی۔
اعلامیے کے مطابق ایکنک اجلاس میں محکمہ موسمیات کا نظام جدید بنانے کے 14 ارب 49 کروڑ 88 لاکھ روپے کے منصوبے کی منظوری دی گئی۔ اجلاس میں جامشورو اور ٹھٹھہ میں پانی فراہمی کے 39 ارب 94 کروڑ روپے کے منصوبے منظور کیے گئے۔
ذرائع کے مطابق ایکنک اجلاس میں لاہور رنگ روڈ جنوبی کو 17 ارب 78 کروڑ روپے سے مکمل کرنے کی منظوری دی گئی۔ اجلاس میں صوبوں میں زرعی ٹیوب ویلز سولر پر منتقل کرنے کے منصوبوں کو بھی منظور کیا گیا۔ ایکنک اجلاس میں خوازہ خیلہ سے بشام تک 48 کلومیٹر طویل شاہراہ کی تعمیر کی منظوری دی گئی۔
اجلاس کے اعلامیے کے مطابق اس دوران پاکستان ایجوکیشن منصوبے کو 14 ارب روپے مالیت سے مکمل کرنے کی بھی منظوری دی گئی۔ پاکستان ایجوکیشن منصوبے کے تحت ملک بھر میں تعلیمی وظائف دیے جائیں گے۔