لاہور (پاک صحافت) پاکستان مسلم لیگ ن نے صوبے میں امن و امان کی بگڑتی صورتحال پر وزیر اعلیٰ پنجاب عثمان بزدار اور وزیر قانون راجہ بشارت سے فوری طور پر مستعفیٰ ہونے کا مطالبہ کر دیا۔ ذرائع کے مطابق مسلم لیگ پنجاب کی ترجمان عظمیٰ بخاری نے کہا کہ امن امان کی بگڑتی صورتحال کے ذمہ دار وزیراعلیٰ پنجاب عثمان بزدار اور وزیر قانون پنجاب ہیں لہٰذا عثمان بزدار اور راجہ بشارت کو فوری طور پر مستعفی ہونا چاہیے۔
تفصیلات کے مطابق پاکستان مسلم لیگ ن پنجاب کی ترجمان عظمیٰ بخاری نے لاہور میں خواتین کے ساتھ بدسلوکی کے بڑھتے واقعات پر تشویس کا اظہار کرتے ہوئے کہا ہے کہ لاہور میں خواتین خود کو غیر محفوظ محسوس کر رہی ہیں۔ عظمیٰ بخاری کا کہنا ہے کہ واقعات نے گھروں سے باہر نکلنے والی خواتین کو تشویش میں مبتلا کردیا ہے۔ ان کا کہنا ہے کہ ایسے واقعات ورکنگ ویمن کو گھروں تک محدود کرنے کی گھناؤنی سازش ہے۔
واضح رہے کہ عظمیٰ بخاری نے اپنے بیان میں مزید کہا کہ خواتین سے پیش آئے واقعات کی فوٹیج نے پولیس کی کارکردگی پر سوالات اٹھادیے ہیں، پولیس کو دورانِ تفتیش معلوم ہوا سیف سٹی کے متعدد کیمرے خراب ہیں۔ عظمٰی بخاری نے وزیر اعلیٰ پنجاب عثمان بزدار پر تنقید کرتے ہوئے کہاکہ عثمان بزدار نے تین سال اپنی نااہلیوں کا بوجھ اداروں پر ڈالنے میں گزار دیے۔